Hans Enoksen: Misissuisitsisoqarnissaanik aalajangigaqarnikuunngilagut

Aalisarnermut Piniarnermullu Naalakkersuisoq Finn Karlsen radioaviisimit ippassaq apersorneqarpoq, Great Greenlandillu aningaasaatai atorlugit pisortaata imminut illuliiutsissimanera aningaasanik atorluisimanertut nalilernerini aperineqarami Finn Karlsen angerpoq. Tamannalu ilungersunartumik unnerluutiginninnertut paasisariaqarnersoq aperineqarami aamma angerluni.

Naalaakkersuisooqatigiit Great Greenlandip pisortaanik suliunnaarsitsinissaminnut aalajangiinikuunngitsut Naalakkersuisut siulittaasuat Hans Enoksen oqarpoq:

- Erseqqissarusuppara Naalakkersuisut ippassaq unnukkut piumaffigaakka ullaakkut qulingilua'qeqqanut piaartumik ataatsimiisinneqassasut. Kisianni tusagssiorfinnut nalunaarummi takuarput Inuit ataqatigiit siulittaasuat piumasaqarsimasoq. Tamanna ilumuunngilaq. Tassa uanga naalakkiutigaara qulingilua'qeqqa ataatsimiinneq ingerlanneqassasoq ippassarli unnukkut.

- Taava naalakkersuisup oqarnera eqqunngitsuusoq oqaatigerusuppara, tassa aalajangertoqanngilluinnaqqissaarmat misissuinermi Michael Nielseni suliunnaarsinneqassasoq. Kisianniliuna misissuinermi tunngavigineqartoq amernut tapiissutit appartikkiartuaanneqarnissaannut siunissami qanoq inissisimassanersugut.

Aalisarnermut Piniarnermullu Naalakkersuisup suliarinnissimanera Hans Enoksenip nalilerpaa:

-Ilungersunarpoq, taama oqariartuuteqarneq, tassa akuerinngilara uanga aamma Naalakkersuisuni aalajangersaasimanngisaannarpugut pisortanut tunngasumik akuliuttarnissatsinnik. Pisortat akuliuffigineqassappat siulilersuisut suliassarivaat, naalakkersuisut minnerpaamilluunniit tassani pisussaaffeqanngillat akuliunnissaminnut. Akuliutissagunik siulersuisut aqqutigeqqaartariaqarpaat.

Aalisarnermut Piniarnermullu Naalakkersuisup nammineerluni iliuuseqarsimanera kinguneqartinneqarpoq.

- Avoqqaarliutigineqarpoq aamma naalakkiutigaara kingorna misissuinermut tunngasunik, pingaartumik Ammerivimmut tunngatillugu oqaaseqartoqaqqissanngitsoq, taamaallaalli oqaaseqartoqassappat Naalakkersuisut Siulittaasuat oqaaseqassasoq.

Finn Karlsenip naalakkersuisuni ilaasortaaginnarnissaa pillugu aperigatsinni akivoq:

- Politiinut tuniussisimaneq politiit suliassarivaat, uagut nalilersuisinnaanngilagut piffissaq sioqqullugu. Ilungersunartumik inisittoqassappat Naalakkersuisunit isummerfigineqaqqittussaavoq, soorunami.

Politiit misissuinerata uppernarsisissappagu Finn Karlsen pinerlutsaalititsinermut inatsimmik unioqqutitsisimasoq, tamatuma qanoq kinguneqarnissaa ima nassuiarpaa:

- Unioqqutitsisimanerit suulluunniit pineqarpata Naalakkersuisuni ilaasortat tassani illersorneqarsinnaaneq ajorput, taavalu tunuartoqartariaqartassaaq qaquguluunniit.

Siumut Atassut Inuit Ataqatigiillu Naalakkersuisooqatigiilermatali allorassaaqatigiinniarnerup ajornartorsioqattaarnera takujuarparput, tamanna pillugu Hans Enoksen oqarpoq:

-Isumaqarpunga Naalakkersuisuni ataatsip kukkusumik taama oqariartuuteqarnera naalakkersuisooqatigiit ajornartorsiornerattut nalilerneqarsinnaanngitsoq aammalu uani suleqatgiiit pingasuuvugut soorunalumi naapinniartarnigut sumiluunniit innarluuteqalaartumik ingerlasarnissaat naatsorsuutigineqartuassaaq, kisianni isumaqarpunga maannamut ingerlanerput ajunngitsumik nalilersinnaallugu.

Naalakkersuisut siulittaasuata Hans Enoksenip erseqqissaatigaa Ammeriviup pisortaanik suliunnaarsitsisinnaanermut Ammeriviup siulersuisuuneri kisimik aalajangiisartussaasut Naalakkersuisullu akuliuttussaanngitsut.

Naalakkersuisuni ataatsimiinneq pillugu Aalisarnermut Piniarnermullu Naalakkersuisoq Finn Karlsen Naalakkersuisut immikkut ittumik ataatsimiinnerannit animmat oqaaseqartinniaraluaratsigu oqaaseqarumanngilaq.