Naalakkersuisut Great Greenland qaqilernialerpaat
Ullaap tungaani Inatsisartuni ataatsimmiinermi oqaluuserineqartoq tassaavoq 2006 - imut aningaasanut inatsisissaq.
Ataatsimiinnermili pingaarnertut ullaap tungaani oqaluuserineqartoq tassaavoq Aalisarnermut Piniarnermullu Naalakkersuisup Finn Karlsen-ip
saqqummiummagu naalakkersuisut ippassaani aalajangersimasut ammeriviup Great Greenland-ip misissuiffigeqqissaarneqarnissaa.
Finn Karlsen oqarpoq misissuinissamut naalakkersuisut aalajangernerannut peqqutaanerpaasoq naalakkersuisoqarfik ilisimateqqaarnagu ammeriviup pisortaata nammineq illussaminik sanaartortitsisimanera, aammalu inatsisit malillugit suliarinnittussarsiuussisarneq avaqqullugu 7 millionit koruunit pallillugit akilimmik sanaartortitsisimanera.
Finn Karlsen oqarpoq misissueqqissaarneq piaartumik aallartinneqassasoq.
Pilersaarutigineqartutut oqaluuserineqarportaaq 2006-imi aningaasanut inatsisissaq.
Tassani saqqummiussisuuvoq Aningaasanut Naalakkersuisoq Josef Motzfeldt.
Saqqummiussinermini sanaartornermi aningaasartuutissat isumaliutersuutini; tassaasut erngup nukinganik nukissiorfiliortiternissat, mittarfiliortiternissat kiisalu umiarsualiviliortiternissanut nutarterinernullu aningaasartuutissatut siunnersuutigiumasani saqqummiummagit.
Partiit oqaaseqartartui aningaasanut inatsisissamut oqaaseqaateqarput, ilaatigut Demokraatit 140 millionit koruuninik sipaarniarnissamut siunnersuutaat Josef Motzfeldt-ip sutigut sipaarniarfissanik nassaartoqarsinnaanera apeqquteqaatigaa.