Umiatsiaararsortut ilinniaqqinnissaminnut periarfissinneqartariaqartut, Demokraatit isumaqarput
Inatsisartut aqagu ataatsimiinneranni oqaluuserineqartussat ilagaat umiatsiaararsorlutik aalisartut piniartullu annertussusileriikkanik ikiorserneqartarnissaannut Kattusseqatigiinneersup Anthon Frederiksen-ip, Inuit Ataqatigiinnersullu Ane Hansen-ip siunnersuutaat, siunnersuulli Demokraatinit isumaqatigineqaanngilaq.
Ane Hansen-ip siunnersuuteqarnermini tunngavilersuutigaa umiatsiaararsorlutik aalisartut piniartullu namminersortutut inuussutissarsiuteqartutut naleqqersuunneqartarnermikkut piniagassakilliortillutik annertussusileriikkanik ikiorserneqarnissamut pisinnaataaffeqartannginnerat inatsisitigut pitsanngorsaavigineqartariaqartoq.
Demokraatilli aalisarnermut piniarnermullu tunngasunik oqaaseqartartuat Jens B. Frederiksen-ip siunnersuummut isumaqataannginnertik ima tunngavilersorpaa:
- Uagut Demokraatiniit siunnersuut isumaqatiginngilarput pissutigalugu piniartut umiatsiaararsorlutillu aalisartut namminersortutut naatsorsuunneqarput, annertussusileriikkanillu ikiorsiisarnermi taakku immikkut pineqalissappata aamma allat namminersotut, soorlu sanasut ajornartoorfinni ikiorserneqarnissaminnut piumasaqalerisinnammata.
Jens B. Frederiksen isumaqarpoq piniartut umiatsiaararsortullu ajornartoorfinni tuaviortuumik tigusinnaasaminnik ikiorsiissutinik taarserneqartariaqanngitsunik pisinnaanissaminnut periarfissaqartariaqartut, imaluunnit piniartut aningaasarsiaqarlutik ilinniaqqissinnanermut periarfissinneqartariaqartut:
- Kinaluunniit nunatsinni perlilertussaanngilaq, taamaattumik sorunami piniartut aalisartullu ikiorsiissutinik ajornartoorfinni inatsisaareersut malillugit pisinnaatitaassapput, tamannalu kommunini tamani assigiimmik atuutsitinneqartariqarpoq, Jens B. Frederiksen oqarpoq nangillunilu:
- Piniartuunerup akilerinnaanera apeqquseeneqartariaqarmat isumaqarpugut piniartut aalisartullu ataasiakkaat piumasullu aningaasarsiaqarlutik allamik ilinniagaqarsinnaanermut amaanneqarsinnaanissaat periarfissiunneqartariaqarpoq, oqarpoq Demokraatineersoq Jens B. Frederiksen.