USA-mi tamat oqarsinnaatitaanerat eqqartorneqartorujussuanngorpoq.
Muuamaamik titartakkat tamatumuuna pineqanngillat - internetili pillugu oqallittoqarpoq.
Kinami inuit pisinnaatitaaffiinut, tamallu oqartussaaqataanerannut tunngassuteqartut, internetimi saqqummersinneqartarneri, qarasaasiaatileqatigiiffissuit Microsoftip aamma Googlep killilersortalersimavaat - Kinami unammillerluni inuussutissarsiorsinnaanissaq tamatumani anguniarneqarluni.
Kinami pisortat nakkutigisaannik inuit 110 millionit internetimik atuisuupput, taakkulu qarasaasiaatileqatigiiffinnit aningaasarsiorfigineqarusupput. Kinami pisortat nittartakkanik killilersuisarput. Killilersorneqartullu ilaat tassaapput; Qilammiorpaluttumik eqqissinerup illoqannginnersartaani inunnik toqoraaneq, tamat oqarsinnaatitaanerannut tunngasut kiisalu inuit pisinnaatitaaffiinut tunngasut.
Qarasaasialeriffissuaq Google Kinami oqartussanit noqqaaffigineqaqattaareerluni qanittukkut nittartakkanik Kinami atuarneqarsinnaajunnaarsitsivoq.
- Kinami innuttasut pisinnaatitaaffiinik killersueqataapput, taamaalillutillu niuernerpalaartumik ingerlatsinatik inuinik naqisimannittunut ilaalerput, Århusip Universitetiani internetimi nittartakkanik misissuisarfimmi pisortaq, Niels Ole Finnemann, oqarpoq.
USA-mi inatsisartut inuit pisinnaatitaaffii pillugit ataatsimiititaliaata USA-mi qarasaasialeriffissuit sisamat pisortai taannarpiaq pillugu ippassaq tusarniaaffigai.
- Kinami nittartakkanik killilersuineq USA-mi sakkortuumik isigineqarpoq ataatsimiititaliamilu siulittaasup sorsunnersuup kingulliup nalaani juutit toqorarneqarneranni IBM-ip toqutassanik allattuisimanerannut allaat assersuutigaa, Niels Ole Finnemann taama oqarpoq nangillunilu;
- Kinami inuit naqisimaneqarlutik nittartakkanik atuisinnaanerat aallarniutigalugu pisortat naqisimanninnerisa sakkortusinissaa annilaanngatingaara. Minnerunngitsumik killilersuinerup kingunerisaanik inuiaqatigiit salloqittaarineqarsinnaapput paasissutissanik eqqunngitsunik naalakkersuisulli paasitikkusutaannaanik tuniorarneqalermata, Niels Ole Finnemann naggasiivoq.