Thor Hjarsen NAMMCO-p ataatsimiinnissaani peqataassanngilaq

Thor Hjarsen biologi assertuussutaaqisoq Demokratit sinnerlugit Nammco-p marsimi Islandimi ataatsimiinnissaani peqataasussaagaluaq peqataassanngiinnarpoq.

Demokraatit inatsisartut ataatsimiinnissaat pillugu namminneq Nammco-mut peqataanissaminnut piffissaqannginnamik, Thor Hjarsen nakkutilliisussatut peqataatissallugu qinnutigisimagaluarpaat.

Nammco-lli qinnuteqarnerat itigartitsissutigivaat Thor Hjarsen partiimut ilaasortaannginnera peqqutigalugu.

-Nammco-p ataatsimiinnissaannut peqataaniaraanni partii sinnerlugu aallartitaaffigisaq ilaasortaaffigisariaqarpoq, Kim Hansen Demokraatini siunnersortaasoq oqarpoq.

Partii Nuummi unnugu naapeqatigiissapput, ilaatigut eqqartussallugu Nammco-p Islandimi ataatsimiinnissaanut peqataatitaqassanerlutik.

Naalakkersuisuniit Piniarnermut Aalisarnermullu naalakkersuisoq Finn Karlsen, atorfilittat, KNAPK-lu peqataassasut, Piniarnermut Aalisarnermullu Pisortaqarfimmi pisortaq Amalie Jessen oqarpoq.