Ulluni 17-ini oqaluuserisassat 83-it

Inatsisartut siulittaasuata Jonathan Motzfeldtip sianeq kasullugu Inatsisartut ataatsimiinnerat aqagu ammassavaa. Inatsisartut sapaatip akunnerini tallimani ukiuunerani ataatsimiinnissaanni oqaluuseerisassat katillutik 83-inik immikkoortoqarput, siunnersuutinik apeqquteqaatinillu imaqartut.

Inatsisartuni ilaasortat ataasiakkaat, partiit inatsisartuni gruppii, naalakkersuisut, naalakkersuisuni ilaasortat ataasiakkaat, Inatsisartut inatsisissaattut peqqussutissaattullu siunnersuutaat, Inatsisartullu aalajangiiffigisassaattut siunnersuutaat sapaatip akunnerisa tallimat ingerlaneranni oqaluuserineqassapput, apeqquteqaatillu mininnagit.

Inatsisartut inatsisissaannik siunnersuuteqartuupput Naalakkersuisut, Inatsisartut Siulittaasoqarfiat Demokraatillu. Naalakkersuisut tallimanik, Inatsisartut Siulittaasoqarfiat ataatsimik kiisalu Demokraatit, ataatsimik inatsisassatut siunnersuuteqarput.

Inatsisartut peqqussutissaattut siunnersuutit katillutik sisamaapput, tassani Naalakkersuisut pingasunik kiisalu Demokraatit ataatsimik siunnersuuteqarsimallutik.

Inatsisartut aalajangiiffigisassaattut siunnersuutigineqartut 37-iupput.

Aalajangiiffigisassatut siunnersuuteqartut tassaanerupput Inatsisartuni ilaasortat ataasiakkaat imaluunnit partiit, taakku saniatigut Naalakkersuisut kiisalu Siulittaasoqarfik aamma siunnersuuteqarsimapput.

Partiit Inatsisartuni ilaasortaatitaqartut tamarmik Inatsisartut aalajangiiffigisassaattut siunnersuuteqarput, tassalu Siumut sisamanik, Demokraatit qulingiluanik, Inuit Ataqatigiit arfineq pingasunik, Atassut tallimanik Kattusseqatigiillu sisamanik. Naalakkersuisut sisamanik kiisalu Inatsisartut Siulittaasoqarfiat pingasunik siunnersuuteqarsimapput.

Inatsisartut ataatsimiinneranni apeqquteqaatit aallaavigaligit oqillisissiat katillutik arfineq pingasuupput Naalakkersuisunullu apeqquteqaatit katillutik 25-llutik.