Nunatta Savalimmiullu nammineq erfalasortik atorlugu OL-mut peqataatitaqartalernissaat suli sulissutigineqarpoq.
Sulissutigineqartoq pillugu Danmarkimi kultureqarnermut ministerip Brian Mikkelsenip Folktinngip kultureqarnermut Ataatsimiititaliaanik ippassaq oqaloqarteqarnissarigalua pinngitsoorpoq. Taamaattorli sulineq ingerlaqqippoq, Brian Mikkelsenip IOC-mi siulittaasoq Jacques Rogge Torinomi OL-qarnissaata nalaani februaarip 20-ianni oqaloqatigisussanngormagu.
Nunatta erfalasorput atorlugu OL-imi peqataasitsisalernissaanik nunatsinni suliniarneq aamma ingerlavoq. Danskit timersornermut kattuffiata piumasaqaataanut akerliuniarluni, Nuummi tallimanngorpat ikumatitalisaarluni ingerlaaqatigiittoqassaaq.
Ingerlaaqatigiinnissaq Nuup timersortarfiata silataanit tallimanngorpat ualikkut tallimaniit aallartissaaq, kulturimut illorsuatta Katuap silataani naggaserneqassalluni.