Nunatta puisit amiinik Canadameersunik pisissaarnerata, Europami kinguneqarnerlussinnaanera Canadami ammerinermik inuussutissarsiuteqartunit ernummatigineqarpoq. Rob Cahill, Canadami ammeriviup pisortaa nutaarsiassaqartitsivimmut CBC-mut taama oqarpoq.
Ammerineq pillugu nunat tamalaat Københavnimi ataatsimeersuarneranni Cahill peqataareersoq oqarpoq, puisit amiisa 1980-kkunnisut pisiariumaneerunnissaat ataatsimeersuaqataasunit ernummatigineqartoq.
Puisit amiinik Canadameersunik Great Greenland pisarunnaassasoq, Naalakkersuisugut januaarip arfernanni aalajangerput. Piseqqusiunnaarneq Canadamiunit Nunavummiunillu assut isorineqarmat, Nunavumit amersisarneq eqquteqqinneqarpoq.