Sermersuatsinnik nakkutiginninneq danskit ilisimatuuisa marluk pitsaannginnerarpaat.
Sermip pissusaanik immikkut ilisimasallit Carl Egede Bøggild Dorthe Dahl-Jensen-illu nunatta sermersuata pissusaata allanngorarneranik misissuinerit nakkutiginninnerillu amigaraat.
-Ukiuni kingullerni sermersuarmi uuttortaaviit ikilisarneqarput. Nunarsuatsinni silaannaap kissakkiartornerata malinnaaviginiarnera ajornakusoornerulerpoq, nakkutilliinermilu atortorissaarutinik pisariaqartitsivugut, Dorthe Dahl-Jensen, issittoq pillugu atuagassiami Polarfrontenimi issuarneqarpoq.
Dorthe Dahl-Jensenip soqutigisaqaqataata Carl Egede Bøggildip uuttortaavinnik ikilisaanerit ernummatigaattaaq. Namminermi sermersuatta sinaani sumiiffinni assigiinngitsuni qulini
uuttortaaffinnik ikkussueqataasimavoq. Isumaqanngilarlu qaammataasat iluaqutsiullugit uuttortaanerit ungasissoq eqqarsaatigalugu naammassasut.
-Qaammataasakkut sermersuaq isorartooq uuttortarneqarsinnaagaluartoq, sermip qaavanik misissuinerit uuttortaanerillu pisariaqartuassasut, Carl Egede Bøggildip oqaatigaa.
Sermersuatta alaatsinaattuarnissaa pisariaqarmat nakkutilliiuarnissamik Danmark suliniuteqartariaqartoq Carl Egede Bøggild isumaqarpoq.