Aasaru sinersortaatinik angallannissami pilersaarutigineqartut nalornisoortitsinerat takornariat uniffigisimagunanngilaat. Danmark-imimi nunatsinni aasaru takornariarumallutik Bella Center-imi paasisitsiniaanermut orniguttut amerlasimaqaat.
-Takorusunneruara sermersuaq. Umimmaat tuttullu iluatsitsissaguma takorusuppakka. Kalaallit qanoq inuusaaseqarnersut, qanorlu najugaqarnersut takorusuppakka.
BellaCenter-imi takornarianut paasisitsiniaanermi soqutiginnilluni orniguttoq Mariia nunatsinnut takornariarumalluni pileritsassimasoq oqaluttuarpoq.
Inuit soqutiginnittut 45.000-it ornigupput, aaqqissuisullu nalunaarutigaat nunatsinnukarniarlutik saaaffiginnittartut ikiliartunngitsut.
Angalatitseqatigiilli minnerusut nalunaarutigaat umiarsuarnik aasaru sinersortussanut inniminniiniarneq nalorninartorsiorfiusimasoq – Arctic Travel Group-ip sinersorneq isumagisarilermaguli pilersaarutitik aatsaat sapaatit-akunneri marluk qaangiuppata saqqummiunniarmatigik. Takornariarniarlutimmi soqutiginnittut Arctic Travel Group-ip pilersaarusiaat amigaraat, Nuummiimmi Ilulissat tungaannut umiarsuarumanerugamik.
Takornariartitseqatigiilli aaqqissuussinermut atatillugu soqutiginninneq naammagisimaarpaat, saaffiginnittummi amerlanerpaartaat danskiummata.
Nunatsinnut takornariarusukkaanni angalatitseqatigiiffiit paasissutissiinerinut ornigulluni paasisassarsiorneq pissarsiffiunerpaasarpoq.