Ilulissani sapaatip-akunnerata naanera eqqissiviilliorfiusimaqisoq politiini pigaartuusoq Flemming Lauritzen nalunaarpoq.
Angut inoqatiminut peqqarniisaarsimasoq angerlarsimaffimminilu aallaasersorsimasoq, sapaatip-akunnerini sisamani politiinit tigummigallagassanngortinneqarpoq.
Inuit akissarsisimallutik eqqissiviilliorsimaqaat, ilaatigut aamma angerlarsimaffinni eqqissiviilliortut arfineq-pingasut missaanniittut politiinit orninneqartariaqarsimapput.
Aamma angerlarsimaffiit ilaanni matumik aserorterineq, qamuteralammillu aalakoorluni ingerlatsisimasoq ataaseq tigusarineqarsimasoq, Ilulissani politiini pigaartuusoq Flemming Lauritzen nalunaarpoq.
Sinerissami illoqarfiit annersaanni allani Tunumilu, sapaatip-akunnerata naanerani inuit eqqissisimasimaqisut, politiinit pigaartut amerlanersaasa nalunaarutigaat.