Eqqartuussissuserisoq Strasbourgimi nassuiaaniarpoq
Inuit pisinnaatitaaffii pillugit eqqartuussivimmi Strasbourgimiittumi aalajangerneq allanngortittariaqartoq, Avanersuarmi piniartut piniarfitoqqaminnik utertitsiniartut eqqartuussissuserisuat Christian Harlang isumaqarpoq, suliaq kukkuneqarpallaartoq unnerlugu.
Inuit pisinnaatitaaffii pillugit eqqartuussiviup akuliunniarnani aalajangiinera misissuataarakku maannamut kukkunerit ilungersunartut amigaatillu 32-it nassaaraakka. Suliaq pitsaasutut taasinnaannginnakku eqqartuussiviup præsidentianut saaffiginnittariaqarpunga, suliap qanorpiaq ingerlasimaneranik oqaluttuukkiartorlugu.
Assersuuteqarsinnaavit, aperaarput.
-Aap, Avanersuarmi najugaqartut tamarmik nuutsitaasimanermut atatillugu taarsiiffigitissimasutut aamma tamarmik nutaanik illutaarsimasutut aalajangiinermut tunngatillugu taakkartorneqarsimapput, tamattami nalunngilarput tamanna eqqunngitsoq, ilaa, Christian Harlang aperaaq.
Oqarportaaq suliaq Hingitaq 53’ip suliakkiissutigimmagu, qanorluunniit sivisutigisumik ingerlaqqissinnaassasoq. Tamannalu peqatigiiffiup aalajangigassarilluinnaraa.
