Strassbourg-ip aalajangernera ICC-p akueriumanngilaa
Inuit issittormiut kattuffiani ICC-mi siulittaasup Aqqaluk Lynge-p, taamatut aalalajangerneq tupaallannartutut nalilerpaa.
- Inatsisileritoorput peqatigalugu taamatut aalajangersimaneq misissoqqissaassavarput, taamatullu aalajangertoqarsimanera pakatsinarpoq, Aqqaluk Lynge oqarpoq.
Inuit Qaanaap eqqaani Uummannami najugaqarsimasut pinngitsaalisaallutik 1953-imi nuutitaasimapput, taassumalu kinguneranik piniariarfigisartagartik aamma annaallugu.
- Strassburgimi inuit pisinnaatitaaffi pillugit eqqartuussivissuup taamatut alajangersimanera misissoqqissaarniarlugu, Hingitaq 53-mi siulittaasoq inatsisileritoorlu Christian Harlang attaveqarfigissavarput, ICC-p siulittaasua Aqqaluk Lynge oqarpoq.
Qaanaap eqqaani Uummannami inuit pinngitaalisaallutik 1953-imi nuutinneqarmata aatsaat qaammatit pingasut qaangiunnerani, inuit pisinnaatitaaffii pillugit isumaqatigiissutip atuutilersimanra itigartitsinermut patsisigitinneqarpoq, tamannalu Aqqaluk Lynge-p patsisaasinnaasutut atorsinnaannginnerarpaa.
- Inuit pisinnaatitaaffii pillugit isumaqatigiissut 1953-imi atuutilersinneqarmat, inuit suli uummannaminngaanniit nussortinneqarput, allaat 1954-i ilanngullugu nuussortitsineq ingerlanneqarpoq, Aqqaluk Lynge ICC-mi siulittaasuusoq oqarpoq.
Qaanaap eqqaani Uummannami najugaqarsimasut nunamik piginnittussaanermut pisinnaatitaaffiit unioqqutinneqarsimanerat aallaavigalugu eqqartuussivilersuussineq aallartippoq. Strassbourgmi eqqartuussivissuup eqqartuussivilersuussisinnaanermut itigartitsinerat suliakkiunniakkamik patsisissaqannginneraallutik itigartitsineq aalajangerneqarpoq.
Thulep eqqaani Uummannami najugaqarsimasut pinngitsaalisaallutik nuutitaanermik kingorna, piniartarfitsik utertitseqqinniarlugu, Danmarkimi eqqartuussivissuarmut ingerlatitseqqikkaluarput, iluatsinngitsumik. Eqqartuussivilersuussineq nangillugu, Inuit pisinnaatitaaffii pillugit Strassbourg-imi eqqartuussivissuarmut ingerlatitsiniaraluarneq aamma iluatsissinnaajunnaalerunarpoq.