Puisit amiinik Canadaminngaanneersunik Nunatta pisiumajunnaarnera, aningaasaqarnermut ataatsimiisitaliamit apeqquserneqarpoq.
Aningaasaqarnermut ataatsimisitaliami siulittaasoq Ellen Christoffersen tusagassiutinut nalunaaruteqarnermini ima allappoq:
- Puisit amiinik Canadameersunik eqqussuinerup unitsiinnarneqarnissaanik Naalakkersuisut januaarip arfernani alajangiinerannut tunuliaqutaasup tamatumalu kingunerisinnaasaasa erseqqinnerusumik paasissutissiissutigineqarnissaat ataatsimiisitaliap immikkut kissaatigaa.
ICC-p siulittaasua aamma qisuariarpoq.
Inuit Issittormit Kattuffiata ullumi Kalaallit Nunaanni Naalakkersuisunut innersuussutigaat Canadamiit puisit amiinik eqqussuinermi killilersuinertik unitseqqullugu.
Sheila Watt-Cloutier isumaqarpoq puisit amiinik Canadaminngaanneersunik Kalaallit Nunaata pisiumajunnaarnera, Inuit qangaaniilli pissarsioriaasianut innarliissasoq.