Kunngissaarannguaq qanoq ateqassava?
Kunngissaaqqap arfininngorpat kuisikkuni qanoq atserneqarnissaa pissanganarpoq, angajoqqaavisalu aternik ullutsinni atugaanerusunut malinnaarusukkunik Magnusimik atsersinnaavaat, Norgemiut kunngiisa atitoqaat taanna, siorna nukappiaqqanut inunngortunut assut atsiunneqartarsimammat.
Kunngissalli nunatsinnut immikkut ittumik atassuteqarnini pillugu ernerminut atermik nunatta Danmarkillu atanerannut ilisarnaataasumik atsiinissaa assut ilimanartoq, Eva Meldgaard Danmarkimi aternik ilisimatooq oqarpoq.
- Kunngissap Kalaallit Nunaat nuannarilluinnarpaa taamaattumik eqqoriarsinnaavara Knud ernerminut atsiutissagaa, Kunuunnguaq, Knud Rasmussen, issittumi ilisimassassarsiortorsuaq atsiullugu.
Dronninngi atermi ilaannik, tassa Islandimiusut aterminik Tjudhildurimik, naqinnertigut ajornartorsiortarmat, kunngissakkut ernertik kalaallisorpiaq naqinneq q-rtalimmik atserunnanngikkaat Eva Meldgard eqqoriaavoq.
Kunngissaaqqap kuisinnera arfininngorpat ullaakkut nalunaaqutaq arfineq marluniit KNRTV-kkut malinnaaffigisinnaavarsi.