KNI-mi siulersuisut siulittaasuata Tage Lennertip ullaaq Radioavisimi naammagittaalliutigaa, Naalakkersuisut siulittaasuat qinersinerup kingorna ataatsimeeqatiseriuminaassimasoq.
Hans Enoksenip tusagassiuutitigut tamanna maanna akissuteqarfigaa, oqarluni, KNI A/S-imi siulersuisuni siulittaasoq pisortaaneqarfillu paasissutissat piginnittut sinnerlugit atorfissaqartitani arlaleriaqaluni piumasarisaraluarlugit suli tunniunneqanngimmata, maanna utaqqeqqissinnaajunnaarluni.
-Allakkatigut arlaleriarlunnga piumasarisartagaraluakka suli tunniunneqanngimmata, Naalakkersuisullu utaqqeqqissinnaajunnaarmata, immikkut ittumik ataatsimeersuarnissaq aalajangiupparput, Hans Enoksen allappoq.
Naalakkersuisut siulittaasuat nangippoq: - Nunatta karsianiit katillugit 160 millioni koruunit sinnerlugit amerlassusilinnik nunaqarfiit kiffartuunneqarnissaannut KNI isumaqatigiissuteqarfigineqarpoq, uangalu akisussaaffeqarpunga aningaasat atorneqartut eqqortumik naatsorsuuteqartinneqarnissaannik, pisussaaffillu tamanna eqqortissagukku, piginnittut sinnerlugit KNI-miit tamakkiisumik paasissutissinneqarnissannik piumasaqaateqarnera eqqortinneqartariaqarpoq.