Immap naqqani killeqarfik ujarneqassaaq
Issittumi Qalasersuup nalaani immap naqqani nunarsuatta qaavani nunavissuit toqqaviani killeqarfinnik misissuineq danskit canadamiullu suleqatigiillutik ingerlatassaat upernaaru apriilimi aallartinneqassaaq, nunatsinni Danmarkmilu nunap sananeqaataanik misissuisarfik GEUS taama allappoq.
Naalagaaffiit Peqatigiit imartat 200 sømilinik killeqarfeqarnissaat pillugu isumaqatigiissutaat Canadamiunit Danskinillu akuerisaavoq, tamannalu naapertorlugu nunat taakku marluk nunamik taassumalu pisuussutaanik piginnittussaanermik atuisinnatitaanermillu tigummiaqarput.
Taammattoqassappalli piginnaatitsissutit arlaqartut akuerineqarsimasariaqarput. Taakku naammassineqarnissaannut Danmark Canadalu sapaatip akunnerini arfinilinni sivisussuseqartusaanngorlugu pilersaarusiukkamik misissuissapput, misissorneqassalluni nunatta Canadallu nunavittaasa immap naqqani killeqarfiat, tassa nunavissuit qalipaasa naapiffiat nunatta Ellesmere Islandillu nalaaniit Qalasersuarmut atanilik.
Misissuinermi LORITA 1-imik atserneqartumi ilisimatuut sikuiuitsumi immamilu sikoqaqisumi 40 sinneqalugit issittartumi misissuissapput.
