Vædderen allamik taarserneqarallassaaq
Imarpiup avannaani nunatta savalimmiullu sineriaanik nakkutilliisoq sakkutuut umiarsuaat Vædderen danskit nunarsuaq tamakkerlugu uumassusilerinermik umaatsulerinermik silaannaap pissusiinik kiisalu kulturimik oqaluttuarisaanermillu ilisimatusarlutik qaammatini arfineq pingasuni angalanissarsuannut peqataassaaq, tamannalu pissutigalugu Vædderen paarlallugu sineriatsinik nakkutilliisinneqalissaaq sakkutuut umiarsuaat nakkutilliissut Thetis.
Vædderen aggustimiit aappaagu apriili ilanngullugu ilisimatusarnermut atorneqassaaq, tassungalu atatillugu 60 million koruunit naliginut atortorissaarutitigut allanngortiterneqassalluni.
Sakkutooqarfiup ilisimatusarnernut peqataatinneqartarnera periusitoqaasoq, nunarsuarlu tamakkerlugu ilisimatusarnernut Galatheanik taaneqartunut marlunnut sakkutuut umiarsuaat atorneqartareernikuusut, Danmarkimi kommandørkaptajni Jens Claus Hansen aviisimut Jyllands-Posten-imut nassuiaavoq.
