Malersorneqarneq misillernarpoq

Sullivinni avatangiisit pillugit inatsit nutaaq ukiortaamit atuutilerpoq, tassani suliffiup peqqinnartuunissaa isumannaatsuunissaalu paragraffit siulleraat. Sulisitsisumit inuttut malersorneqarneq peqqinnanngitsuusoq radioaviisimit oqaluussatta misillerfigaa.

-Suliffinni annertulaartumik misiginikuuara nikassarneqarneq nakkarsarneqarneq, taakkulu nuanniitsumik kingunerinikuuaat soorlu uanga imminut tatiginera appangaatsiarluni. Nuanniilliortarlunga suliartuleraangama.

Apersukkatta inuttut malersorneqarnermi nalaani suliartornissi nakeriunnaarpaa, inuttut nuannaarunnaarpoq, naarluttalerpoq niaqorluttalerlunilu. Sulisitsisup nikassaanneri suliamut oqaaserisanulluunniit tunngasinnaasarput.

- Pisariaqanngitsumik illuatungileqattaartuarlugit, soorlu oqaaseqaruma taava akissutigeqqaartarpaa naagga. Kisianni oqaatsikka imaluunniit suliarisimasakka nammineq iluaqutissamisut atortarpai.

Suliffimmi pisortaasoq nakkarsaanermini pinngitsuusaartarpoq arlallitsigulli siorasaarisutut pissusilersortarsimalluni allaat nerrivik tilluttarlugu akerlilerneqarumanngivittarlunilu. Ukiup ataatsip missaani suliffimmi malersortissimaneq imaaliallaannaq qaangigassaanngilaq.

- Qaangerniarsimavara siullermik suleqatikka oqaluttuuttarlugit. Tapersersuisarput. Piffissap ingerlanerani supervision atorluarlugu qaangerniarnikuuara.

Supervision tassaavoq inummik allamik oqaloqateqartarluni imminut tatigeqqilerniarneq, apersukkatta nammineq oqarneratut imaajartinneq. Ullumikkummita qanoq ippa?

- Sivisuumik atuunnikuugami sivisuumik suliassanngornikuuvoq ajoraluartumik. Apersukkatta aterminik isertuusserusuttup allat suliffimminni nikassagaasutut misigisut, qullersanut imaluunniit sulinermut atatillugu kattuffigisamut saaffiginninnikkut, erngerlutik ikiortissarsiortarnissaannik siunnersorumavai.

Sulineq pitsanngorsarniarlugu siunnersuutit KANUKOKA-p Namminersornerullutillu Oqartussat nittartagaanni aamma atuarneqarsinnaapput.