Narsami raajaleriffik suliassaaleqivoq

Royal Greenland-ip Narsami fabrikkia ingerlanerluppoq. Suliffeqarfiup kommunimi inuussutissarsiornikkut pingaarnerpaajusup, qaammatini arlaqalersuni sulisuni sapaatip akunnerata ingerlanerani ullut sisamat angerlartiinnartariaqartarpai.

Raajarniuteeqqat marluk, 79-erit, sapaatip akunneranut 40 tonsit missannik tulaassuigaluarput, taakkuli inunnut 50-inut ulloq ataasiinnaq suliassaqartitsipput.

Royal Greenland-ip pisortaa Henrik Leth radioaviisimut oqarpoq, Narsami fabrikkip matunissaanik pilersaaruteqarnatik.

-Kisianni taqqavani ulluni makkunani atukkat isumaliutersuutigaavut. Isummersoqatigiittariaqarpugut siunissami qanoq iliuuseqarsinnaanerluta, Henrik Leth oqarpoq.

Narsap Kommunia Naalakkersuisunut saaffiginnissuteqarsimavoq, paasiniarlugu fabrikki siunissami qanoq piniarneqarnersoq.

-Naalakkersuisunit Royal Greenland-imillu pisortatigoortumik ilisimatinneqarnatalu suli akissutisinngilagut, borgmester Kiista P. Isaksen oqarpoq.

Nuannaarutiginerarpaali Royal Greenland-ip pisortaanerata Keld Askjær-ip januaarip ingerlanerani Narsamut tikeraarnissi pilersaarutigilersimammagu.