Nunatsinni 2006-imi toqutsisoq siulleq

Nunatsinni toqutsineq siulleq, ippassaq januaarip aallaqqaataani Tasiilami pivoq.

Tasiilami politeeqarfiup pisortaa Kristian Singertât oqarpoq, angutip danskiusup 43 –nik ukiulik 13 –eriarluni savissuarmik kapineqartarsimanini toqussutigisimagaa. Toqutsineq ippassaq januaarip aallaqqaataani ullaakkut pisimavoq.

Angut kalaaleq 35 –nik ukiulik tigusaraarput, kisianni maannakkorpiaq naluarput toqutsisuusimanersoq, Kristian Singertât ilisimatitsivoq.

Toqutsinerup saniatigut aallaasersortoqarsimavoq. Arnaq 17 –iinnarnik ukiulik qunusaaralunilu eqqaassisimavoq. Qujanartumik allat inuunerannik naleqarsimanngilaq. Pinngitsaaliisimanerit pingaasut nalunaarutigineqasimapput. Taakkunannga unnerluutigineqartut iperagaasimapput pinngitsuutinneqarlutik.

Upernavimmi, Uummannami, Aasianni Qasigiannguanilu politeeqarfiit pisortaasa unnersiutigaat ulluni kingullerni illoqarfinni pineqartuni eqqissisimasoqarsimanera. Ingammik Qeqertarsuarmiut eqqissisimasimapput, ulluni kingullerni pingasuni politiit taamaallaat ataasiarlutik sianerfigitissimapput eqqissiviilliortoqarnerarlugu.

Kisianni Sisimiuni, Nuummi, Paamiuni, Qaqortumi Narsamilu politiit ulapissimaqaat , angerlarsimaffinni eqqissiviilliortoqarluni, nakuusertoqarsimalluni parnaarussiveeqqanilu unnuisitsisariaqartarsimallutik.

Nanortalimmi eqqissimanerusimaqaat, angerlarsimaffinni eqqissiviilliortitsinerit qulit ilungersunartuunngitsut orniguffigisimagamikkit.

Sisimiunili siornatigornit angerlarsimaffinni eqqissiviilliortitsisut amerlanerusimapput. Decemberip 31-niinnaq qulingiluariarlutik aggersarneqarsimagamik.