Angutit pingasut persuttaasimasut Ilulissani politiinit tigusarineqarsimapput
Ukiortaaq inunnit nuannattorpassuarnit iserluarfigineqarpoq, aammali politiinut ulapaarfiusimalluni.
Ukiumulli 2006-imut ataatsimut isigigalugu iserluaqaagut.
Taamaakkaluartorli Ilulissani politiit angutit pingasut nakuusersimasut unnuaq tigusarisimavaat.
Angutit pineqartut ilaata nuliani saassussimavaa, kinguninngualu tigusaalluni. Angulli taanna ullumi iperagaavoq, nakuusersimasutulli unnerluutigineqarluni, kingusinnerusukkullu eqqartuunneqassasoq Ilulissani politiit oqarput.
Angutit inuusuttut allat marluk ulloqeqqata siorna aamma tigusaapput, inuusuttoqatertik nakuuserfigisimammassuk. Saassunneqartoq misissortikkiartorluni napparsimmaviliartariaqarsimavoq, unitsinneqartariaqarsimananili. Radioaviisip aallartinngitsiarnerani paasivarput, angutit taakku suli iperagaasimanngitsut. Politiinit apersorneqarsinnaanngikkallarput, suli aalakoorpallaaramik.
Politiit Kalaallit Nunaat tamakkerlugu ukiutoqqap unnuaani ulapaarsimaqaat, aserorterisorpassuusimapput pingaartumillu angerlarsimaffinni eqqissiviilliortorpassuit orninneqartariaqarsimallutik.