Qummoroortartut nunamut igittakkat/ heksehylit 18- inik ukioqalersimanngitsunut tuniniarneqaqqusaanngillat, kisiannili tamatta ilisimavarput meeqqat imminnut avatangiisitillu ulorianartorsiortillugit inersimasunik ilaqaratik heksehylinik pinnguartartut.
Maniitsumili politiit ajornartorsiut iliuuseqarfigaat, politeeqarfiup pisortaa Jens B. Frederiksen ima oqaluttuarpoq.
-Qularingilara maaniinnaanngitsoq ajornartorsiutaasoq, uagulli meeqqat qummoroortartunikigittakanik pinnguartut atornerluisut nammattooraangatsigit arsaartarpagut oqarfigalugillu angajoqqaatik ilagalugit aasinnaagaat, Jens B, Frederiksen oqarpoq.
Jens B. Frederiksen oqarpoq suli arsaakkaminnik aallertoqanngitsoq, kisiannili taamaattoqassappat qanoq ulorianartigineranik aammalu qanoq atorneqarsinnaanerinik ilitsersuussiniarlutik.
Jens B. Frederiksen-ip erseqqissaatigaa qummoroortartut igeriuttakkat ulorianarsinnaasut aammalu inuit tungaanut igeriunneqarnatillu allanngortinneqarlutilluunniit qaartarneri sakkortunerulersillugit atorneqaqqusaangitsut, aammalu illersuuteqarnissaq soorlu isarussanik pingaaruteqarluinnartoq.
Qummoroortartortarnermut inatsisit malillugu meeqqat 18-init inorlugit ukiullit qummoroortartunik tuneqaqqusaanngitsut, kisiannili meeqqanik heksehylinik tigummiartunik arsaarinninnerminni aamma pinerluttulerinermik inatsit atorsinnaallugu:
-Arsaarinninnermi pinerluttulerinermut inatsit paragraf 64 atorsinnaavarput, tassani pisatat atortulluunniit atornerlunneqarnernik inatsit allaqqavoq, aammalu politiit maleruaqqusaat aqqausinermi eqqisisimanissamut tunngasoq atorneqarsinnaavoq, Jens B. Frederiksen oqarpoq.
Jens B. Frederiksen-ip erseqqissaatigaa angajoqqaat meeqqatik akisussaaffigigamikkit qummoroortatinik igeriuttakkanik tunissagunikkit meeqqatik igeriuttaanerannik ilagisariaqaraat.