Royal Greenlands Narsami immikkoortua ingerlanerluppoq. Piffissami sivisoorujussuarmi raajanik tulassuisoqarsimanngilaq. Inatsisit naapertorlugit sulisut soraarsinneqarsinnaanngillat. Aamma suliffeerukkaluarlutik annertussusileriikkanik Inunnik Isumaginninnermi allaffimmiit ikiorsiissutinik pisinnaatitaanngillat.
Narsami Royal Greenland-ip fabrikkiani sulisut sinniisaat Kristian Petrussen tamanna pillugu oqaloqatigaarput.
- Oktoberimili sivisoorsuarmik suliunnaarpugut. Ullut suliffiit kisikkakkit, novembarimi ullut sisamaannaat sulisimavugut, decembarimilu sapaatip akunneranut ullut marluinnaat sulisarluta. Taamatut atugaqarluni artorsarnaqaaq, tassami uanga suleqatikkalu arlallit inatsisit malillugit ikiorserneqarsinnaasimanngillat. Akilersugassaqarpugut inuuniartariaqarlutalu Kristian Petrussen oqarpoq, nangillunilu: - nammineerlunga utoqqarmiuni paarlattaasariaqartarsimavunga, tassami ikiorsiissutinik pisinnaasimanngilagut, suliffitsinnit soraarsitaanikuunnginnata.
Kristian Petrussen oqarpoq, annertussusileriikkanik ikiorserneqarsinnaannginnertik sualuppallaartoq. Sulinermik Inuussutissarsiuteqartut Kattuffiata siulittaasua Qanoruumut ippassaq oqarpoq, inatsit taanna allanngortinneqartariaqartoq, taamaattummik Jess G. Berthelsen-imut paasiniarparput, SIK inatsimmik taassuminnga allanngortitsiniarluni qanoq suliniuteqarsimanersoq.
- Uagut isumaqarpugut annertussusileriikkanik ikiorsiissutinik pisoqarsinnaasoq, kisiannili taanna assortuussutigineqarluni. Tamanna pillugu socialankenævnimut suliassanngortitsisimavugut, ulloq mannaæi tikillugu inerniliinermik suli tusagaqarata. Tassunga tunngatillugu aaqqissutissamik peqqussutissamut nutaamut aaqqiiniarnikuuvugut. Suliffeqanngikkallarnermi ikiorsiissutit pillugit inatsisartut peqqussutissaanut nutaamut neriuppunga upernaamut akuerineqassasoq, tassa suliffeqarfiit matugallarnerini annertussusileriikkamik ikiorsiisoqartalernissaanik peqqussutissaq. Isumaqaraluarpunga tamanna ullumikkut periarfissaasoq, tamannalu ullumikkut suli assortuussutigineqarpoq.