Tartupaluk pillugu februaarimi isumaqatigiinniartoqassaaq

Qeqertaq tusallattaartaqisarput, Tartupaluk, Hans Ø, keermiaasiit tusallattaarfigilissagunarparput - tassa danskit canadamiullu naalagaaffimmi atorfilittaat februaarimi ataatsimiissapput, Tartupaluk – Kalaallit Nunaata kitaata avannaani inissisimasoq - nunamut sorlermut atanersoq saqqummiutissallugu.

Naalagaaffiit Peqatigiit oktoberimi ataatsimeersuarmata, nunanut allanut Danmarkimi ministeri, Per Stig Møller, aamma canadamiut nunanut allanut ministeriat, Pierre Pettigrew, isumaqatigiissuteqarput, tassa ”Erfalasulerngusaanneq” taamaatinneqassasoq oqallisigigamikku. Ileqquusimagaluarpormi Tartupaluk tikikkaanni canadamiut erfalasuat Dannebrogiluunniit ikkunneqartarluni.

-Isumaqatigiinnikuuvugut Tartupaluk tikeraassagaangatsigu immitsinnut ilisimateqqaartassalluta, tamanna oktoberip ulluisa 31-ianni isumaqatigiissutigaarput aallartitaq ilisimatitsivoq.

Nunanut allanut ministereqarfimmiit aallartitaq, Peter Taksøe-Jensen, nutaarsiassaqartitsivimmut Ritzauimut oqarpoq, killiffitik februaarimi ataatsimiinnerminni saqqummiutissagitik.

- Assortuunnerpulli qaqugu qaangiutissanersoq nalunaqaaq, Taksøe-Jensen ilaliivoq.

Tartupaluk 1,3 kvadrat-kilometeriuvoq, Kalaallit Nunaata Avannaata Canadamilu Kennedy Kanalip akornanni inissisimalluni. Qeqertaq pingaaruteqarujussuartutut ullumikkut immaqa nalilerneqarsinnaanngikkaluarpoq, silaannaalli allanngoriartornera pissutigalugu, sermeq tamaani aakkiartupiluussagaluarpat, aqqut taanna Europap Aasiallu niueqatigiinnerat taamanikkumut pingaarutilerujussuanngorsinnaavoq.

Issittumi killeqarfik taanna pillugu Danmark Canadalu 1973-imili isumaqatigiissuteqarput, Tartupalulli pillugu aaqqiangiissuteqartoqarmat, qeqertaq taannarpiaq taamanikkumiilli assortuutaajualersimavoq.