Ukiortaamiit KNI-p umiarsuaatileqatigiiffittaavata Assartuiviup nunaqarfinni angallassineq akisussaaffigilerpagu, sinerissami nunaqarfimmiut angalassagunik nalusassavaat ulloq suna angalasinnaassanerlutik.
KNI- pisortaanera Gerhardt Petersen oqarpoq Namminersornerullutik Oqartussanut kiffartuussinissamut isumaqatigiissuteqarfigisaat pilersaarusiorneqarsimasut; kisiannili nunaqarfinni amerlanerni assartugassat naapertorlugit angalasarniarlutik:
-Ukiumi nutaami marloqiusamik angalasartussaavugut, pisussaaffeqarfigisavut pilersaaruteqarluta angallavigisassavavut; kisiannili pisussaaffeqarfiginngisavut pilersaaruteqarata angalasassalluta, tassalu nunaqarfinni taakkunani assartugassat naapertorlugit angalasassaagut, Gerhardt Petersen oqarpoq.
Gerhardt Petersen oqarpoq umiarsuit imarpikkoortaatit timmisartullu tikittarneri naapertorlugu angalasarnissaq pilersaarutaasoq. Tassalu piffiisamik aalajangerisimasumik tikiffissaq pilersaarutigineqanngitsoq.
-Kujataani Qaqortumiit Arsummut Kangilinnguinullu, qeqqani Nuup, Maniitsup Sisimiullu kiisalu avannaani Uummannap nunaqarfiini pisuussaaffeqarpugut, sinnerinilu pisussaaffeqqanngilagut, tassalu aalajangersimasumik tikiffiusarfissanik pilersaaruteqarata; taamaattorli sapaatip akunneranut ataasiarluta tikittassalluta, Gerhardt Petersen oqarpoq.
Gerhardt Petersen oqarpoq imarpikkoortaatit sapaatit akunnikkaarlugit illoqarfinnut tikittarneri naapertorlugit angalasassallutik. Aamma oqarpoq nunaqarfimmiut angalaniarunik niuertumut saaffiginninnikkut qaqugukkut angalasoqarnissaa paasiniaasinnaassasut.
KNI-ip umiarsuaatileqatigiiffittaavata Assartuiviup nunaqarfinni assartuisussanik umiarsuaaqqanik tallimanik glasfiberinik sanaajusunik inunnillu aqqaneq-marlunnik aammalu assartugassanik tonsinik qulinik usisinnaasunik Tuluit Nunaanni sanatitipput. Siullerlu aasaru julimi atuutilissaaq kingulleq 2007-imi atuutilissalluni.