- Sumilluunniit sipaartoqanngilaq, Nuup kommunea ukiortaap kinguninngua ataatsimeersuarnermik taaneqartumik Kiinamut peqataajartorpat, taama Sermitsiami ullumi saqqummersumi allassimasoqarpoq.
Nunatsinni illoqarfiit pingaarnersaat sinnerlugu januaarip 9-ianiit 20-iata tungaanut, akileraartartut akiligaannik kommunip aallartitai inuit 15-t, politikerit tallimat, borgmester Agnethe Davidsen siuttoralugu Kiinamiissapput.
Angalanissaq tamanna 325.000 koruuninik saniatigullu atugassanik naleqarpoq, Sermitsiami erseqqisaatigineqarpoq.
Taama angalasoqassaaq ”Winter Cities”-ertoqassammat, ”Winter Cities” ukioq allortarlugu pisarpoq. Taanna nunat aqqanillit illoqarfiillu 19-t tamarmik sakkortuumik ukiorsiortartut suleqatigiiffigaat. Taamalu borgmesterit ataatsimiittarput, saqqummersitsisoqartarluni immikkullu ilisimasalinnut oqalliffeqartarluni, ilaatigut misilittakkanik isumassarsianillu taaseeqatigiittarlutik.
Kiinamilu ataatsimeersuariatornissami sammineqassamaarporooq “ineriartorneq.”