Nunatsinni atorfiit qaffasinnerit kalaallinik inuttaqannginneri pissuteqarpoq Namminersornerullutik Oqartussat danskit oqaasii atuarfinni pimoorullugit atuartitsinermi ingerlatinngimmagik.
Danskit inatsisartuini nunarput pillugu ataatsimiititaliami Dansk Folkeparti sinnerlugu ilaasortap Søren Espersen-ip nunatta namminiilernissaanut piffissaannginnerarpaa.
-Siunertatta ilagaat Kalaallit Nunaanni atorfiit qaffasinnerusut kalaallinit inuttalersoqqaarlugit namminiilersinnaaneq.
Namminersornerullutik Oqartussat sinnattuallutillusooq namminiilivinnissaq takorloorsimavaat, naak tamanna ilinniartitaaneq aqqutigalugu piviusunngortittussaallugu, Søren Espersen oqarpoq.
Kalaallit oqaasii danskit oqaasiinut sanilliullugit pingaartinneqarpallaarsimapput.
Ukiut 20-t 25-t matuma siorna kalaallit qaffasinnerusunik ilinniariarlutik ajornannginnerusumik naammassinnissinnaasimagaluarput, ullumikkulli taamaagunnaarsimavoq
Naalakkersueqataasut De Konservative Folkepartip pissusissamisoorsorinngilaa Danmarkip nunatta oqaasissaqarfigeriigaanut tunngasut akuliuffigissagai.
Ilinniartitaanerli eqqarsaatigalugu kisiannertaqarsinnaavoq, konservativ-ini nunarput pillugu oqaaseqartartoq Per Ørum Jørgensen:
-Kalaallit Danmarkimut ilinniariartortut taama amerlatigitillugit pissusissamisoorsinnaavoq peqatigiilluta ilinniartitaanermut apeqqutip oqaloqatigiissutiginissaa.
-Inuusuttummi ilinniariaraluarlutik danskit oqaasii ajornartorsiutigippatigik ilinniarneq pissusissaatut ingerlanneqarsinnaanngilaq, pitsaanngitsumillu kinguneqarsinnaalluni.
-Pingaaruteqarpoq namminiilivinnissap aqqani danskit oqaasiisa ilinniarnermi aqqutissatut suusupaginaveersaarnissaat.