Inuit issittormiut issittumi inuuinnarnissamut pisinnaatitaaffiup eqqortinneqarnissaa anguniarlugu USA eqqartussisulersuunniaraluarpaat akissaqaratilli.
Silaannaap allanngoriartornera pillugu Naalagaaffiit Peqatigiit Canadami Montrealimi ataatsimeersuartitsineranni tallimanngormat pisumi Inuit Issittormiut USA pisuutippaat inuit pisinnaatitaaffiinik unioqqutitsinerarlugu.
- Silaannaap allanngoriartorneranut Amerikamiut naammaginartumik suliniuteqarsimanngillat, Qalasersuarmi sikuujuaannartup annikilliartorneratigut piniartutut inuussutissarsiorneq ajornartorsiorpoq, silaannaap allanngoriartorneratigut avatangiiserput kulturerpullu issittumi piniarnermik tunngaveqartut aserorterneqarput, issittup issittuaannarnissaa pisariaqartipparput, Sheila Watt-Cloutier, ICC-ip præsidentia taama oqarpoq.
Taamaattoq Inuit Issittormiut Kattuffiata inuit issittumiittut katillutik 155.000-it sinnerlugit, USA-mut pissaanilissuarmut eqqartuussisulersuussinissamut akissaqanngilaq, tamannali uniffiginagu USA, Washington-imi USA-mi inuit pisinnaatitaaffii pillugit ataatsimiititaliarsuarmut naammagittaalliutiginiarpaa.
USA-p nunarsuarmi nunani tamanit gassimik CO2-mik silaannarmik mingutsitsinera annertunerpaavoq, tamannalu Issittormiut naammagittaalliuuteqarnerannut tunngaviuvoq.
Naammagittaalliuut 163-inik qupperneqarpoq, inuillu katillugit 63-it Canadameersut Alaskameersullu ilisimannittutut nassuiaataannik aamma imaqarluni.
USA sinnerlugu Montrealimi ataatsimeersuarnermut peqataasup Paula Dobrianskip Issittormiut naamagittaalliuutiginninniarnerat oqaaseqarfiumanngilaa.