Air Greenland-ip timersorneq tapersersorpaa

Air Greenland-mi tunisinermi pilerisaarinermilu pisortaq Hans Jørgen Mørch oqarpoq, Air Greenland-ip Timersortartullu Kattuffiata isumaqatigiinnerat tamanut iluaqutaassasoq.

- Avammut Air Greenland-ip imminut nittarsaanniarnerani, Air Greenland-ip timersorneq tapersersoraa takutissinnaavarput. Aamma nunarput tamakkerlugu timersorneq atuupput, taamaammat Air Greenland-ip atiata saqqumilaarnissaa pingaaruteqarpoq. Aamma Timersortartut Kattuffiat ukiuni kingullerni arlaqartuni sulqeqatigisarsimavarput, ukiunilu tulliuttuni suleqatigiittuarnissarput naatsorsuutigaarput, Hans Jørgen Mørch naggasiivoq.

Timersortartut illoqarfinnut allanut unammiartussatillutik angalasarnerneranni, Air Greenland-ip Timersortartullu Kattuffiata isumaqatigiissutaat nutarterneqarmat, timersortartut isumalluarnerulersinnaasut, Timersortartut Kattuffiata siulittaasua Nuka Kleemann oqarpoq.

- Tassa ukiut tamaasa angalanermut tunngatillugu akikillisaavigineqarnissamik Air Greenland-imut isumaqatigiissuteqartarpugut. Isumaqatigiissutip nutarternerani pitsanngoriaateqarpoq, tassa timersortartut suli akikinnermik angalasinnaalerput, Nuka Kleemann, Timersortartut Kattuffianni siulittaasoq oqarpoq nangillunilu: - Timersortartut umiarsuarmik angalasartut, siunissami timmisartumik angalasalernissaat neriuutigaarput, tassami maannakkut akit unamminarsimmata. Aamma ulluinnarni nammineq kajumissutsiminnik sungiusaasut aqutsisullu siunissami oqinnerusumik atugaqarsinnaalissapput, Nuka Kleemann naggasiivoq.