Nunat tamalaat issittoq pillugu ilisimatusartoqarnissaanut atatillugu Canada 150 dollarsinik tapiissuteqarpoq. Taannalu ilisimatusarneq qulequtaqartinneqarpoq; Nunat tamalaat issittuni ukiorititaat.
Taama aningaasanik amerlatigisunik Canadap tapiinera tunngaveqarpoq, ukiuni makkunani issittumi silap pissusii tamatumalu inunnut uumasunullu sunniutai ilisimatusarfigineqartorujussuanngorsimammata.
Taama Nunat tamalaat issittumik ukiorititaqarnerat ukiuni marlunni ingerlanneqassaaq, tassalu 2007-imiit 2008-p tungaanut ingerlanneqassalluni.
Isumaavorlu issittoq qalasersuarlu kujalleq pillugu ilisimatusarnersuaqassasoq.
Kingullermik ukiut 50-t matuma siorna Nunat tamalaat issittoq pillugu ukiorititaqarput, maannalu aallartittussami aatsaat siullermeertumik ilinniartut kulturikkullu suliallit peqataatinneqassapput.
Maannamut nunat 50-t sinnillit peqataasussatut nalunaarsorneqareerput, taakkunannga Kalaallit Nunaat aamma akuutinneqarpoq.
810 millionillu taakku canadap tapiissutigisai, canadamiut ilisimatuuisa issittoq pillugu qalasersuarlu kujalleq pillugu ilisimatusarnerannut atorneqassapput.