Ujaqqat guldtimik platinimillu akoqarsorisat Canadami misissorneqassapput

Aatsitassarsioqatigiiffiup Nuna Mineralsip Nuup Kangerluani Qeqertarsuarmi aatsitassaqarneranik aasap ingerlanerani misissuisitsivoq, ujaqqallu misissuisugassatut tigusat Canadami maannakkut missisortinneqarput.

Tigusanik misissuineq naammasseqqajaalerpoq, ukiup nikinnerani inerneri paaseqarsinnaalissasut, NunaMineralsip pisortaa Ole Christiansen oqarpoq.

Ujaqqat uuttortagassat siornagut ilivitsuutilugit nunamut uutortarneqarfissaannut nassiunneqartaraluarput, massakkulli suleriaaseq allannguallassimavoq.

- Ujaqqat akuinik Canadami uuttortaanissaq pitinnagu ujaqqat Nuummi aserorteqqissaarneqarput Canadamullu nassiunneqarlutik, ujaqqallu aasaq misissuinermit tigusat kingulliit sapaatip akunnerani kingullerni Canadamut nassiunneqarput, Ole Christiansen oqarpoq.

Ujaqqat Nuup Kangerluani tigusat pinngoqqaatinik akoqassusii, soorlu guultinik platininik assigisaannillu akoqassusii Canadami uuttortarneqartarput.

- Neriuppugut ujaqqat akoqassusiinik uuttortaasarnerit nunatsinni aappaagumiit ingerlanneqarsinnaalissat, taamaattoqartalerpat misissuinerit sukkanerujussuarmik ingerlanneqarsinnaalissammata, Ole Christiansen oqarpoq.