Angut 51-inik ukiulik Ukkusissaneersoq ukiumi ataatsimi affarmilu pinerluuteqarsimasunut isertitsivimmiittussanngorlugu Uummannap eqqartuussiviani pineqaatissinneqarpoq. 1976-imiit 2005-imut nukappiaqqanik 18-inik atornerluisimasutut kannguttaalliorsimatullu eqqartuunneqarpoq.
Politiit piumasarisimagaluarpaat ukiuni marlunni parnaarussaanissaa, sulialli ilaasa pisoqalisimaneri pissutigalugit ukiuni aappaa affarmi pineqaatissinneqarpoq.
Eqqartuussisup Jens Møllerip oqaatigaa nukappiaqqat atornerlunneqarsimasut ilaata arnaataata angut atornerluisoq nalunaarutigisimavaa.
Nunaqarfimmi tusarneqarmat angutit atornerlunneqarsimasut allat nalunaajortortiterput.
Sooq siusinnerusukkut nalunaarutigineqarsimannginnera apeqqutigineqarmat, akisimapput tamarmik nalunaarutigissallugu ersigisimagaat, atornerlugaanertillu kanngusuutigisimagamikku.
Uummannami eqqartuussinermi ulluni marlunni ingerlanneqartumi, nukappiaqqat atornerlunneqarsimasut, maannalu inersimasunngorsimasut uppernarsaallutik nassuiaateqarput.