Suliffigissaaneq 2008-mi
Nunatsinni sullivinnik naliliisarneq 2008-imi inatsisitigut peqqussutaalersussaammat, suliffeqarfiit kaammattorneqarput, 2008 nallertinnagu inatsisilioqqullugit suliffinni avatangiisinik pitsaasunik pilersitsinissaq siunertaralugu. Tamanna Namminersornerullutik Oqartussat nittartagaatigut allaaserineqarpoq.
Timinik sungiusaasoq Kaalat Møller 2002-mili suliffigissaaneq pillugu ERGON-imik taaguutilimmik siunnersuisarfeqalersimavoq. Suliffeqarfinnik nalilersuisarpoq, paasinarsimmat, periaaseq sullivimmi avatangiisinik pitsaasunik, peqqinnartunik atugarissaarnartunillu pilersitsinissamut sakkussaqqittoq. Danmarkimi sullivinnik naliliisarneq 1994-imili peqqussutaalerpoq, nunatsinnilu 2008-imi eqqunneqartussanngorluni.
- Eqqunneqartussanngornera inatsisitigullu peqqussutaalernissaa nuannaarutigeqaara, pisariaqaqimmat. Tamanna pingaarluinnarpoq, sullivimmi atukkat erseqqissisarmata paasiuminarnerulersarlutillu. Kaalat Møller oqarpoq, nangipporlu:
- Aamma suliffik pitsaasuugaangat napparsimalluni sulinngitsoortarnerpassuit pinngitsoorneqarsinnaalersarput, tamakkumi ilaatigut suliffimmi avatangiisit pitsaasuunnginnerannik peqquteqarsinnaasarmata. Suliffimmi atukkat pitsaasuunerat ajunngitsuinnarmik sunniuttarpoq. Erseqqissaavoq.
Kaalat Møllerip assigiinngitsunik sammivilinnik ilinniarsimasut suleqatigalugit, suliffeqarfimmi timikkut tarnikkullu atugarisat nalilersortarpai.