Inatsisartut ataatsimiinnerat ammarpoq
Inatsisartut nutaat nalunaaqutaq aqqanermiit ataatsimiinnerat Inatsisartunut siulittaasup Jonathan Motzfeldtip ammarpaa. Inatsisartunngortut ataatsimeeqqaarneranni Inatsisartunut qinigaasut 31-it qinigaasinnaanerat akuersissutigineqassaaq kiisalu Inatsisartut Naalakkersuisullu siulittaasussaannik qinersisoqarluni. Ataatsimiinneq aallartimmalli akunneq ataaseq ingerlareerpoq.
Inatsisartut ataatsimiinneannik ammaasuuvoq Inatsisartuni sivisunerpaamik manna tikillugu ilaasortaasimasoq Siumumeersoq Jonathan Motzfeldt.
Danmarkimi naalakkersuisut Folketingi Islandimi Altingi Savalimmiormiut kiisalu Dronngerput margrethe Aappaat inatsisartortaarnermik ilisimatereersimagini Jonatha Motzfeldt ilisimatitsivoq.
Ataatsimiinneq aallarnerlugu oqalugiartoqareermat qinersisimaneq pillugu nalunaaruteqatoqarpoq kingornalu inatsisartunngortut qinigaasinnaatitaanerat akuersissutigineqarluni, Jonathan Motzfeldtip erseqqissarpaa inatsisartuni ilaasortanngortut pinerlutulerinermut inatsisinik unioqqutitsisimanerannik nalornisitsisoqanngitsoq.
Inatsisartut siulitaasussaannik qinersisoqarpoq. Siumut naalakkersuisunngortitsiniarnermi isumaqatigiinniarnissamut piginnaatitsissummik tigummiaqartut, Jonathan Motzfeldt Inatsisartut siulittaasussaattut siunnersuutigaat. Siunnersuut partiinit naalakkeruisooqatigiilersunit Kattusseqatigiit Partiiannillu akuersaarneqarpoq Demokraatit taaseqataanngitsut. Taamaalilluni Jonathan Motzfeldt qinersivimmi matumani Inatsisartut siulittaasuattut ingerlaannartussanngorpoq.
Naalakkersuisut siulittaasuannik qinersisoqarpoq. Hans Enoksen Siumumit siunnersuutigineqarpoq, naalakkerusuisullu siulittaasussaattut Atassummit Ia-millu akuersaarneqarluni. Demokraatit tassani taaseqaataanngillat.
Demokraatit siulittaasuata Per Berthelsen-ip erseqqissaatigaa ataatsimiinnermi matumani Demokraatit illuatungliuttutut inissittut taaseqataassanngitsut.
Naalakkerusisuni ilaasortassatut naalakkersuisuni siulittaasunngoqqittup Hans Enoksen-ip siunnersuutini saqqummiuppaa. Naalakkersuisuni ilaasortanngortussatut siunnersuutigineqarlutik:
Josef Motzfeldt IA, Aningaasanut Nunanullu Allanut naalakkersuisutut.
Aalisarnermut Piniarnermullu naalakkersuisutut Sivert K. Heilmann, Atassut.
Angallannermut Attaveqarnermut Ineqarnermut Aatsitassanullu, Siumumeersoq Jørgen Wæver Johansen.
Kultureqarnermut ilinniartitaanermut Ilageeqarnermut Ilisimatusarnermullu, Doris Jakobsen, Siumut.
Ilaqutariinnermut Inatsiseqarnermullu naalakkersuisutut, Aleqa Hammond, Siumut.
Kiisalu Peqqissutsimut Avatangiisinut Pinngortitamullu, Asii Chemnitz Narup, IA.
Inatsisartut ataatsimiinnerat nalunaaqutaq ataatsimut nanginneqarpoq tassani ullormut oqaluuserisassat sinneri oqaluuserineqassallutik. Ilaatigut oqaluuserineqassaaq Aappaagu Aningaasanut Inatsisaangallartumut allanguuteqarnissaq, inuiaqatigiinni pisussat kinguartinneqarsinnaanngitsullu aningaasaliiffigineqarnissaannik imaqartoq.
