Galathea 3 nunatsinnut aamma paasisassarsiussaaq

Galathea 3-p paasisassarsiorluni angalanissaa, tassalu danskit umiarsuarmut ilaallutik nunarsuarmik kaajallaanissaat aappaagu pissaaq. Danskit ukiuni 50-init ikinnerunngitsuni paasisassarsiorlutik taama angalasimanngillat. Alapernaarsuut Vædderen atorlugu paasisassarsiortoqassaaq, umiarsuarlu taanna Nunatta imartaani nalinginnaasumik angalasaraluarpoq.

Vædderen Københavnimit Savalimmiut aqqusaarlugit nunatsinnukassaaq, nunatsinneereerunilu Thailand, Singapore, Azorerne, Tasmania, sikuiuitsoq kujalleq, Amerika–kujalleq, Panama qeqertaaqqallu Caraibiamiittut tikissavai, naggataatigullu Københavnimut utissalluni.

Vædderen qaammatini arfineq-pingasuni angalassaaq.

Ilisimatusaatigineqartut assigiinngitsut 72-it Vædderenimi angalaatigaluni ilisimatusarfigineqassapput, ilaatigut nunatsinni avatangiisip silaannaallu allanngoriartornera misissuivigineqassallutik. Aamma Indiami pualluummut tuberkolosemut akiuiniarnermut tunngasut, qeqertaaqqani kiattuni ingefærinik naatitsisarneq kiisalu silaannaap allanngoriartornera nunallu sajuttarnera misissuivigineqassapput. Vædderen nunatsinnit aallarpat alapernaarsuutinit allanit taarserneqarallassasoq, Kangilinnguani sakkutooqarfik ilisimatitsivoq.