Hans Enoksen ukioq 2003-mi Naalakkersuisut siulittaasuattut ilassinninnermut aningaasartuuteqarpallaarsimasoq, Atuagagdliutit-ni ullumi saqqummertuni allaaserineqarpoq. Hans Enoksen katillugit 242.000 koruuninik taamani aningaasartuuteqarsimaneragaavoq.
Aningaasat atorneqartut ilaatigut angalanernut atorneqartarsimapput, ilaatigut Hans Enoksen-ip nulia 58.000 koruunit nalingannut 2003-mi inuiaqatigiit akiligaannik angalaqataasarsimalluni.
Naak ullormusiaqartitsisoqartarsimagaluartoq sulinermut atatillugu aamma akileraartartut akiligaannik nereqatigiittoqartarsimavoq.
Tamakkuli tamarmik nassuiaatissaqartut Namminersornerullutik Oqartussat pisortaanerat Kaj Kleist erseqqissaavoq, oqarluni, ilassinninnermut aningaasartuutinut ilanngunneqartarsimasut kukkusumik nalunaarsorneqartarsimasut, atornerluisoqarsimanngitsorlu.