Angallassineq pillugu paasitinneqarumapput

Ukiortaami januaarip aallaqqaataanit qaatsiartaammik angallassinissap aallartinnerata kingorna Uummannap kommuniani innuttaasut angallannikkut atugassarititaasunik paasisaqarumallutik Pilersuisumut allagaqarput.

Uummannap Kommuneani borgmesteri Jens Lars Fleischer uparuaavoq, illoqarfimmut allamut nunanulluunniit allanut Uummannarmiut ukiortaamit angalassagunik maannangaaq inniminniisinnaanngitsut, angallassisartut Pilersuisup pilersaarutai pillugit tusagaqarsimanngimmata.

Jens Lars Fleischer qalleqqissaalluni allappoq, Qaarsuni mittarfik pillugu qanoq iliortoqarnissaanik erseqqissumik nalunaarfigineqarsimanatik.

- Minnerunngitsumik januaarip aallaqqaataata kingorna nunaqarfitsinnut pilersuineq qanoq inissisimassanersoq ilisimatinneqanngilagut, Jens Lars Fleischer allappoq.

Nangipporlu:

- Ilisimavarput, nunaqarfinni talittarfiit pillugit suliniuteqartoqanngitsoq, kiisalu suli qulakkeerneqanngilaq angallat qaatsiartaat Uummannap illoqarfiani angerlarsimaffeqassanersoq.

Aamma erseqqissaavoq maanna novemberi qitseqqutereermat tamanna nukingiullugu erseqqissumik assortugassaanngitsumillu akissuteqarfigineqartariaqalersoq.