Demokraatit maanna erseqqissaapput, Atassummut piumasaqaatigisimanagu partiinik arlariinnik ataatsikkut isumaqatiginniarnissaa.
Radioavisimi ippassaq unnukkut oqarpugut, Demokraatininngaanneersut Palle Christiansen aamma Per Berthelsen oqarsimasut, Inuit Ataqatigiillu isumaqatigiissimallutik Atassut isumaqatiginiarneqassappat, piumasaqaataassasoq Atassutip isumaqatigiinniarnerit marluk ataatsikkut ingerlatissanngikkai. Tamannali maanna eqqunngitsoq Demokraatit siulittaasuat erseqqissaavoq.
- Atassutip Siumumik isumaqatigiinniarneranut Demokraatit akuliukkumanatillu akuliussinnaanngillat, Atassutip kikkunnulluunnit isumaqatigiinniarnissaq pisinnaatitaaffigimmagu. Per Berthelsen taama allappoq.
Inuit Ataqatigiit siulittaasuat Josef Motzfeldt ippassaq unnukkut aamma erseqqissaateqarpoq, Inuit Ataqatigiit Atassummut immikkut piumasaqaateqarsimanngitsoq, oqarlunili, Siumut partiitut anginersaammat Atassutip tassunga isumaqatigiinniarnissaa ataqqillugu.
Naalakkersuisunngortitsinissaq siunertaralugu isumaqatigiissuteqartoqarsimaneranik manna tikillugu tusarliussisoqanngilaq.