Atassut Siumullu kaffisoqatigeeqqissapput

Atassut Siumukkunnit kaffisoriartoqqeqquneqarpoq, kaffisoqatigiinnerlu ualeru pissaaq. Naalakkersuisunngortitsinissaq siunertaralugu isumaqatigiinniarnissamik Siumut pissarsisut illua´tungaani Inuit Ataqatigiit Demokraatillu naalakkersuisunngortitsisinnaanerannut Atassut aalajangiisuulluinnartussatut inissippoq.

Siumup Atassut ippassaq ullaakkut kaffisoqatigaa, ualerulu kaffisoqatigeeqqissapput. Naalakkersuisunngortitsinissarli sammineqanngitsoq Atassutip siulittaasuata erseqqissaatigaa.

- Naapiffeqarsinnaanermut misissueqqissaartoqassasoq suullu isumaqatigiinniutigineqarsinnaanersut taamaallaat oqaloqatigiissutigaavut. Finn Karlsen ippassaq oqarpoq.

Atassutip ulluinnarni aqutsisui Inatsisartunullu ilaasortartaavi suli Nuummut tikissimanngimmata isumaqatigiinniartoqalinngitsoq, Finn Karlsen erseqqissaavoq.

Aamma oqarpoq, Atassut Siumumut ippassaq oqarsimasoq, partiinit allanit qaaqquneqarnissamut ammallutik, partiilli allat suli qaaqqusisimanngillat.

- Inuit Ataqatigiit Demokraatillu naalakkersuisunngorusukkunik qaaqqusariaqarpaatigut. Finn Karlsen ippassaq oqarpoq.