Isumasiuipallanneq

KNR-ip isumasiuipallannerata ersersippaa Demokraatit siuariarujussuassasut, inatsisartunilu partiit annersanngussasut tassami qulingiluanik ersititsissangatinneqaramik. Isumasiuipallannerit ualimut sisamat tungaannut ingerlasut naapertuutissappata, tassa taamak inerneqarput.

Inernerlu tamanna demokraatit maannakkut tallimanik isertitaqarnerannut sanilliullugit amerleriarnerujussuuvoq.

Nalunaaqutaq sisamat tikillugit siumut isertitaminiit quliusuniit ataaseq kisiat annaavaa, taamaattorli aamma demokraatituulli inatsisartuni isertitaqarluassaaq.

Tamannali suli allannguinissamik inerneqarataannaavoq Demokraatit IA-kkullu suleqatigiilernerisigut.

Inuit ataqatigiit isertitani arfineq-pingasuusut suli pigiinnassavai. Taamaalillutik partiit taakku marluk suli amerlanerussuteqassapput.

Atassut ilaasortaatitaminit arfineq-marluusunit pingasut annaassavaat, Kattusseqatigiillu ilaasortaatitani ataaseq pigiinnassallugu.

Isumasiuipallanneq illoqarfiit annerusut tallimat qinersiviisa silataanni ingerlanneqarpoq. Taakkunani qinersisartut qinersereersut KNR-p immersugassaanut taasaminnik nalunaarsuisarput.

Isumasiuipallannermi sisamat tungaanut ingerlanneqartumi qinersisartut 2987-t immersuisinneqarsimapput, isumasiuipallannermilu erserpoq kisimiillutik qinigassanngortittut arlaannaalluunniit inatsisartunut isissanngitsut.