Demokraatit IA-lu suleqatigeeqquaat

Sermitsiami saqqummertumi kingullermi HS Analyse-p isumasiuinera naapertorlugu paasinarsivoq, inatsisartunut qinersereernerup kingorna, qinersisartut amerlanerpaat kissaatigigaat, Demokraatit Inuit Ataqatigiillu naalakkersuisuutitaqalernissaat.

Demokraatit siulittaasuata Per Berthelsenip tamanna naammagisimaarnerarpaa, siusinnerusukkummi nalunaarutigereerpaa Inuit Ataqatigiit suleqatigisinnaalluarlugu. Isumasiuineq kingulleq tunngavigalugu Siumumik suleqateqarsinnaaneq naaggaarsinnaanngorpaa.

Per Berthelsenip erseqqissaatigaa, qinersineq naammassinngitsorluunniit partiit siuttuisa kikkut suleqatigissallugit nalunaarutiginissaa naleqquttuunngitsoq.

- Siumup maannamut qineqqusaarnera suleqatigiissinnaanermut tunngavissanik ersersitsinngilaq, pitsaanerullunilu Siumumut illua´tungiliuttunngoraanni, Per Berthelsen oqarpoq.

Siusinnerusukkut isumasiuinernit Demokraatit kinguarialaarsimagaluarlutik inatsisartuni ilaasortaatitassaat suli arfineq-pingasuussangatinneqarput.

Naatsorsuisimanerup inernera Per Berthelsen-ip naammagisimaarpaa, neriuutigalugu marlunngorpat qinersinissami suli siuariarnerusinnaanertik.