Kalaallit Nunaanniit nunanut allanut tunioraaneq suli ingerlalluarpoq. Qaammatit qulingiluat ukioq’manna siulliit kisitsisaanni Kalaallit Nunaanni Naatsorsueqqissaartarfiup nalunaarutaani tamanna erserpoq.
Nunanut allanut tunisinernut katillugit milliardi 648 millioni koruunit isertitsissutaasimapput, siorna ukiup taamaalineranut naleqqiullugu 39 millioni koruunit sinnerlugit amerlanerullutik, qaffariaat 2,5 procent.
Raajat aalisakkallu pisarnertut isertitsiffiunerpaapput, tunisat 95,6 procentii taakkunannga pissarsiarineqarlutik.
Raajat akii suli appasikkaluartut raajat nunanut allanut tunineqartarnerini akit nalimmassarneqartarput. Raajat 60.000 tonsit ukioq’manna tunineqarput – siorna taamaalinerani tunisanit 10.000 tonsinik amerlanerit.
Qaleralinnik tunioraaneq aamma ingerlalluarpoq – 20 procentimik annertuseriarsimalluni.