Sapaatip-akunnera kingulleq nuna tamakkiusavillugu eqqissiviilliorfiusimaqisoq politiinut paasiniaanitsinni paasivarput.
Upernavimmi arnaq marlunnik meeralik, aappaa arfinilinnik ukiulik aappaalu tallimanik qaammatilik, qimaannarlugit imeriarsimasoq, ilaqutaasa politiinut siarnutigisimavaat.
Qeqertarsuarmi inuusuttut marluk, 15-inik aamma 18-inillu ukiullit, suliffeqarfinnut tallimanut sisamanngormat tillinniarsimapput, mamakujuttunik, sodavandinik aningaasanillu tillissimallutik.
Maniitsumi angut 44-nik ukiulik putsumik najuussuinermit kingunerisaanik ipisimavoq. Igaassaminik ikkussisimassangatinneqarpoq siniliinnarsimagunarlunilu. Ikuallanneq igamit aallartinneqarsimassangatinneqarpoq.
Nuummi angut inuusuttoq 22-nik ukiunik eqqartuussivimmut sassartinneqarpoq, arnamik persuttaasimasutut pasillugu. Arnaq ilaatigut kiinaatigut assaatigullu savimmik kapoorsimavaa.
Paamiuni arfininngormat aamma savilersortoqarsimavoq. Ualikkut festertuni assortuuttoqalersimavoq, angutillu 25-nik ukiullip anguteqatini 30-nik ukiulik naavatigut savimmik kapisimavaa. Angut kapineqartoq qulimiguulimmik sapaatiummat ullaakkut Nuuliaanneqarpoq.
Tasiilami arfininngormat ullaakkut pinngitsaaliisoqarsimavoq, angutip 22-nik ukiullip arnaq 20-nik ukiulik pinngitsaalisimallugu.
Illoqqortoormiuni tallimanngormat arfininngormallu imminornissamik siorasaarutit tallimat siarngutigineqarsimapput.