Kalaallit Nunaat top 1000-imi ilaavoq
Nuummi suliffeqarfiit arlallit Danmarkimi suliffeqarfiit annerpaat 1000-it allattorsimaffianni takuneqarsinnaapput. Nittartagaq Nuuk Nyt taama allaaserisaqarpoq.
Danmarkimi suliffeqarfiit annerpaat 1000-it allattorsimaffianni normu 83-iuvoq Royal Greenland-ip suliffeqarfissua.
Polar Seafood normu 241-voq Air Greenlandilu normu 352-iulluni. Aamma Tele Greenland anginerpaat allattorsimaffiannut 461-imik norlumulerlugu ilanngunneqarsimavoq.
Danmarkimi suliffeqarfiit anginerpaat 1000-it allattorsimaffiannik suliaqartitsisuuvoq aviisersuaq Berlingske Tidende. Suliffeqarfiit isertitaat naapertorlugu tulleriiaarineq ingerlanneqarsimalluni.
Suliffeqarfiit annerpaat allattorsimaffiannut nunatsinni suliffeqarfiit allat aamma ilaasut tassaapput KNI Pisiffillu.