Grønlandsbanki ingerlalluarpoq

Aningaaserivik Grønlandsbanki aatsaat taama aningaasarsiorluartigaaq. Ukiup sisamararterutaa qaangiummat takuneqarsinnaavoq akileraarutit suli peernagit 71 million koruuninik sinneqartoorsimasoq.

Piffissami tassanerpiaq siorna 45 million koruunit missaannik sinneqarsimapput.

Taarsigassarsisitsinermut pappialanullu qularnaveeqqutinut katillugit 1,9 milliarder koruunit atorneqarsimapput, siorna 515 million koruuniusimallutik.

Kalaallit Nunaanni aningaasarsiorneq ukioq’manna pitsaanerulaalersimavoq. Raajat akii qaffakkiartuaarput, pisarineqartartullu suli annertoqaat, Grønlandsbankip nalunaarusiaani allassimavoq.

Immikkoortortaqarfinni aningaasat isaasut malunnaateqarluartumik qaffakkiartorput. Pingaartumillu illoqarfinni anginerni aningaasarsiornikkut ineriartortoqarneruvoq.