Arctic Umiaq Linep qallunaat piginneqatigiillutik ingerlatsiviannit Arctic Travel Groupimit pisiarineqarnera nunatsinni sulinermik inuussutissarsiuteqartut kattuffiani SIK-mi tupaallaatigineqarpoq.
Takornariat salliutillugit ingerlatserusuttup Arctic Umiaq Linemik pisinera SIK-mit ernumanartoqartinneqarpoq.
- SIK-mi ilaasortat umiarsuarnut ilaasarnerisa annertuumik killilerneqarnissaat ernummatigaarput, pisisup takornarianik angallassinissaq pingaarnerutikkaa paasinarmat, Jess G. Berthelsen SIK-p siulittaasua allappoq.
Nunaqavissut umiarsuarnut ilaasut naammaginartumik kiffartuunneqarnissaat kiisalu umiarsuarni inuttaasut inuttaaginnarnissaat aamma qulakkeerneqarsimanersut SIK-p paaserusuppaa.
- Paasivarput umiarsuarni inuttaasut ineqatigiiaartussanngorlugit allanngortiterisoqarniartoq. Tamanna pillugu inuttaasut atugarliulinnginnissaat qulakkeerneqarsimanersoq paaserupparput, Jess G. Berthelsen allappoq.
Arctic Travel Group-ip siulittaasua Søren Rasmussen oqarpoq; Arctic Umiaq Line-mi massakkut inuttaasut inuttaaginnartinneqarnissaat siunertaasoq.
Arctic Travel Groupip Arctic Umiaq Line 65 million koruunilissagaa isumaqatigiissutigineqarpoq, pisinermillu isumaqatigiissut Arctic Umiaq Linep siulersuisuisa inatsisartullu aningaasaqarnermut ataatsimiititaliaata akuersissutigisussaavaa.