Aarrup neqaa qillertuusani

Nunatsinni igasut unammersuaarnerat naammassiniariaannartoq Ruslandip issittortaani nunap inuii mamasarsaataasinnaasumik allarluinnarmik sassaalliuteqarnialerput: tassalu aarrup neqaa qillertuusaaqqamut immiutaq!

Ruslandip kangiani Tjukotkami inuit naggueqatitta nunaqarfigisaanni Lorin-imi tamanna isumassarsiarineqarsimavoq, aarrullu neqaanik qillertuusaararmiunik misiliutigalugu tunisassiorneq maanna ingerlanneqartoq, issittumi internettikkut nutaarsiassiisarfik Circumpolar Musings allaaserisaqarpoq.

Aarrup neqaa uusoq orsortalillu neqinut akuutissanik naasunik panertunik, taratsunik qasilitsunillu akoorlugu Gorbatovami neqilerivimmi suliareqqaarneqarsimavoq, maannalu qillertuusaaqqanut poorlugu tunisassiaasinnaasutut inuussutissalerisunit akuerineqarsimalluni.

Aarrup neqaa uusoq taama tunisassiarineqarnialermat nunaqarfimmi utoqqaat ooqattaarsitinneqarsimapput, mamarsaqimmatalu tunisassiornissaq aalajangiunneqarsimalluni.