Kalaallinut Danmarkimi najugaqartunut inuuniarnermikkullu ajornartorsiuteqartunut Folketingi 450 million koruuninik tapiissuteqarpoq. Kalaallit Illuutaat Danmarkimiittut 3 million koruuninik ukiuni sisamani tulliuttuni aamma atugassinneqarput.
Kalaallit illuata Løvstrædimiittup tapiiffigineqarneratigut kalaallit angerlarsimaffeqanngitsut suliffeqanngitsullu sammisassaqartitsiviat naapittarfiallu ”Qiperoq” Vesterbromiittoq taamaalilluni matuneqassanngilaq.
” Qiperoq” -mi ingerlatsisuusoq Beathe Milfeldt oqarpoq aningaasaliiffigineqarnertik orniguttartunut iluaqutaassasoq:
-Periarfissaqarnerujussuanngussuugut ”Qiperup” ingerlaqqinnissaanut. Ukiut pingasuinnaat aningaasaliiffigineqarnikuugaluarpugut, maannalu aningaasanik tapiiffigineqarnitsigut sulisoq ataatsimik ilasinnaanngorpugut, Beathe Milfeldt oqarpoq.
Beathe Milfeldt aamma oqarpoq kalaallinit suliffeqanngitsunit angerlarsimaffeqanngitsunillu ornigarneqartaqigamik sullissinertik taamaalilluni aamma pitsaanerulersinnaasoq.
- Atuisut kissaatigiuartarsimavaat assassornikut pikkorissartinneqarsinnaaneq, immaqa taamaalilluta aamma periarfissaq aamma ammaanneqassaaq, Beathe Milfeldt oqarpoq.
Kalaallit illuat Løvstrædimiittoq 990.000 koruuninik aningaasaliiffigineqarpoq, taakkunannga 700.000 koruunit Qiperumut atorneqassapput, 180.000 koruunillu inunnik ineriartortitsinermut sullissiviup
Arctic Innovatorsip ulluni 14- ni pikkorissartitsineranut atorneqassallutik.