Inatsisartunut qinersinissaq sapaatip akunnerinik pingasunik sioqqullugu isumasiuinerit ersersippaat Demokraatit qinersinermi siuariangaatsiarniartut.
Suliffeqarfik ISUMA kingullermik isumasiuimmat paasinarsivoq Demokraatit inatsisartuni qulinik ilaasortaatitaqalissasut. Taamaalilluni Demokraatit inatsisartuni partiinit tamanit ilaasortaatitaqarnerpaalissasutut isikkoqarpoq.
IA-kkut Siumukkullu arfineq-marlunnik ilaasortaatitaqalernissaat ilimagineqarpoq. Atassut qinersinermi ajorsarnerpaasussatut ilimagineqarluni pingasunik ilaasortaatitaqalernissaa ilimagineqarpoq.
Isumasiuineq naapertorlugu Kattusseqatigiit inatsisartuni ilaasortaatitartik ataaseq pigiinnassavaat.
Qinersisartut arlallit suli taasinissartik nalornigaat isumasiuinermi erserpoq.
Inatsisartuni ilaasortat pingasut partiinit sorlernit ilaasortaassanersut suli takuneqarsinnaasimanngilaq.
ISUMA-p inuit 1187-t isumasiorsimavai.
Internetikkut, qarasaasiami allakkasuaatikkut sianeqattaarnikkullu isumasiuineq ingerlanneqarpoq.